455 Kilo ng Basura, Nakolekta sa 3rd Quarter River Clean-Up sa Ilog Alitao
Published by
Tayabas City CICRO

UMABOT SA APATNADAAN LIMAMPU’T LIMANG KILO NG BASURA ang nakolekta sa isinagawang 3rd Quarter River Clean-Up sa Spillway ng Ilog Alitao, sakop ng Barangay Wakas, ngayong Huwebes, September 17, 2026.
Sa direktiba ni Mayor Piwa Lim ay matagumpay na naisagawa ang 3rd Quarter River Clean-Up sa pangunguna ng Tayabas City Environment and Natural Resources Office (CENRO), sa pakikipagtulungan ng Tayabas Cooperative Development Office, bilang pakikiisa sa Manila Bay Clean-Up, Rehabilitation and Preservation Program at sa Iyam-Dumacaa River System Water Quality Management Area.
Tumulong sa river clean-up ang mga kawani ng Pamahalaang Lokal ng Lungsod ng Tayabas, mga opisyal ng Barangay Wakas, Bureau of Fire Protection (BFP-Tayabas), at iba't ibang kasapi ng mga kooperatiba bilang pakikiisa sa pagdiriwang ng Annual International Coastal Clean-Up at World Clean-Up Day.
Sa dami ng basurang nakolekta mula sa ilog, muling nananawagan ang mga ahensyang nangangalaga sa kapaligiran na maging responsable sa pagtatapon ng basura at iwasang magtapon sa mga ilog at iba pang daluyan ng tubig.
Ang wastong pagtatapon ng basura ay mahalaga hindi lamang sa pagpapanatili ng kalinisan ng kapaligiran, kundi maging sa pangangalaga sa mga hayop at iba pang yamang nabubuhay sa ilog, gayundin sa kaligtasan at kalusugan ng mga pamayanang nakatira malapit dito.
#LungsodnaInyongMaipagmamalaki
Source: Tayabas City CICRO - City Information and Community Relations Office
Photo report
Scenes from the story







Source
Tayabas City CICRO
